مني لانڊرنگ ڪيس: بئنڪنگ ڪورٽ اڳوڻي صدر آصف زرداري جي گرفتاري جو حڪم ڏئي ڇڏيو

ڪراچي(اسٽاف رپورٽر) بينڪنگ ڪورٽ جعلي بينڪ اڪائونٽ ذريعي مني لانڊرنگ واري ڪيس ۾ اڳوڻي صدر آصف علي زرداري جا ضمانت نه ٿيڻ جوڳا گرفتاري وارنٽ جاري ڪري ڇڏيا آهن. ڪراچي جي بينڪنگ ڪورٽ ۾ جعلي بينڪ اڪائونٽس ذريعي مني لانڊرنگ واري ڪيس جي ٻڌڻي ٿي، ان سلسلي ۾ ٻه مک جوابدار انور مجيد ۽ عبدالغني مجيد عدالت ۾ پيش ٿيا، جن کي ايف آءِ اي جي اپيل تي جسمانيرمانڊ تي ايف آءِ اي حوالي ڪيو ويو. ايف آءِ اي پاران آصف زرداري سميت ڪيس ۾ نامزد وڌيڪ 15 جوابدارن جي گرفتاري وارنٽ جاري ڪرڻ جي اپيل ڪئي. عدالت ايف آءِ اي جي اپيل منظور ڪندي اڳوڻي صدر آصف علي زرداري سميت ٻين فراري جوابدارن جا ضمانت نه ٿيڻ جوڳا گرفتاري وارنٽ جاري ڪري ڇڏيا، جڏهن ته عدالت سمورن جوابدارن کي 4 سيپٽمبر تائين گرفتار ڪرڻ جو پڻ حڪم ڏنو آهي. بيڪنگ ڪورٽ جن فراري جوابدارن جا ضمانت نه ٿيڻ جوڳا گرفتاري وارنٽ جاري ڪيا آهن انهن ۾ نمر مجيد، اسلم مسعود، عارف خان، نصير عبدالله حسين لوٿا، عدنان جاويد، محمد عمير، اقبال آرائين، اعظم وزير خان، زين ملڪ ۽ مصطفيٰ ذوالقرنين شامل آهن. جوابدارن جا وڪيل فاروق ايڇ نائيڪ ۽ شهادت اعواڻ به عدالت ۾ پيش ٿيا. جوابدار انور مجيد عدالت ۾ ميڊيا جي موجودگي تي اعتراض ڪندي چيو ته توهان چيو هو ته ميڊيا نه هوندي جنهن تي ايف آءِ اي آفيسرن ميڊيا کي اشارو ڪندي پوئتي ڪري ڇڏيو. ايف آءِ اي طرفان جوابدارن جي لسٽ عدالت ۾ پيش ڪئي وئي جنهن موجب آصف زرداري ۽ سندس ڀيڻ فريال ٽالپر جو نالو 19 ۽ 20 هين نمبر تي آهي جڏهن ته فريال ٽالپر گرفتاري کان بچڻ لاءِ ضمانت حاصل ڪري چڪي آهي، ايف آءِ اي طرفان اڳوڻي صدر آصف علي زرداري کي مفرور قرار ڏنو ويو آهي. عدالت اڳوڻي صدر آصف علي زرداري سميت سمورن جوابدارن جا ضمانت نه ٿيڻ جوڳا گرفتاري وارنٽ جاري ڪري ڇڏيا آهن.