وزيراعظم جي چونڊ اڄ ٿيندي، عمران خان ۽ شهباز شريف وچ ۾ مقابلو

اسلام آباد (بيورو) وزيراعظم جي چونڊ اڄ ٿيندي، عمران خان ۽ شهباز شريف ۾ مقابلو، ملڪ جي 22 هين وزيراعظم جي چونڊ اڄ ٿيندي، چونڊ لاءِ رڳو عمران خان ۽ شهباز شريف پنهنجا نامزدگي ڪاغذ جمع ڪرايا جيڪي منظور ڪياويا. قومي اسيمبلي سيڪريٽريٽ موجب وزارت عظميٰ لاءِ اميدوارن جا نامزدگي ڪاغذ 2 وڳي تائين وصول ڪيا ويا ۽ مقرر وقت تائين ٻن ميمبرن نامزدگي ڪاغذ جمع ڪرايا. وزارت عظميٰ لاءِ تحريڪ انصاف چيئرمين عمران خان ۽ مسلم ليگ ن جي صدر شهباز شريف طرفان نامزدگي ڪاغذ جمع ڪرايا ويا آهن. نامزدگي ڪاغذن جي ڇنڊ ڇاڻ کانپوءِ منظور ڪيا ويا. وزيراعظم جي چونڊ لاءِ قومي اسيمبلي4 جي چونڊ شام ساڍي 3 وڳي شروع ٿيندي جنهن دوران قائدايوان جي چونڊ ڪئي ويندي. هر اميدوار لاءِ قومي اسيمبلي هال ۾ هڪ هڪ لابي مخصوص هوندي جيڪو اسيمبلي ميمبر جنهن اميدوار کي ووٽ ڏيڻ چاهيندو تنهن لابي ۾ هليو ويندو جنهن بعد ميمبرن جي ڳڻپ کانپوءِ اڪثريت حاصل ڪرڻ وارو اميدوارملڪ جو نئون وزيراعظم هوندو. قومي اسيمبلي جي قاعدن موجب 342 جي ايوان ۾ وزيراعظم جي چونڊ لاءِ ڪنهن به اميدوار کي 172 ووٽ وٺڻا پوندا جيڪڏهن 172 جي اڪثريت نه ملي ته ايوان جي اڪثريتي ميمبرن مان چونڊ ڪئي ويندي. قومي اسيمبليءَ ۾ قائد ايوان جي چونڊ لاءِ ڪاميابي عددي اڪثريت رکندڙ پارٽي جي هوندي. قومي اسيمبليءَ ۾ 152 سيٽون تحريڪ انصاف وٽ آهن جڏهن ته مسلم ليگ ن جون ايوان ۾ 81 ۽ پ پ جون 54 سيٽون آهن. مجلس عمل 15، ايم ڪيو ايم 7، بي اي پي 5،بي اين پي مينگل 4،مسلم ليگ ق3، جي ڊي اي 3، عوامي مسلم ليگ، جمهوري وطن پارٽي۽ اي اين پي جي هڪ هڪ سيٽ حاصل آهي جڏهن ته 4 سيٽون آزاد اميدوارن وٽ آهن.