مراد شاهه وڏو وزير، سراج دراني اسپيڪر، ريحانه لغاري ڊپٽي اسپيڪر نامزد، ڪوبه پاڻ کي تاحيات نه سمجهي: بلاول

ڪراچي(رپورٽ: منصور کوکر) پيپلز پارٽي جي اڳواڻ ناصر حسين شاهه چيو آهي ته سنڌ حڪومت ۾ شامل ٿيڻ لاءِ ايم ڪيو ايم کي سنڌ جي ورڇ واري ايجنڊي تان هٿ کڻڻا پوندا، 2023 ۾ بلاول ڀٽو ملڪ جو وزير اعظم بڻجندو. اها ڳالهه هن ڪراچي ۾ ميڊيا سان ڳالهائيندي ڪئي. ناصر حسين شاهه چيو ته سنڌ اسيمبلي جو اجلاس سومر جي ڏينهن ٿيندو، جنهن ۾ نوان چونڊيل ميمبر حلف کڻندا. مراد علي شاه کي سنڌ جي وڏي وزير لاءِ نامزد ڪيو ويو آهي، جڏهن ته آغا سراج دراني کي سنڌ اسيمبلي جي اسپيڪر ۽ ريحانه لغاري کي ڊپٽي اسپيڪر لاءِ نامزد ڪيو ويو آهي. ناصر حسين شاهه جو چوڻ هو ته بلاول ڀٽو اسيمبلي ميمبرن کي ڪارڪردگي بهتر بڻائڻ لاءِ وارننگ ڏئي ڇڏي آهي، بلاول ڀٽو گڊ گورننس، شفافيت ۽ ميرٽ تي زور ڏنو آهي، 2023 ۾ بلاول ڀٽو ملڪ جو وزير اعظم بڻجندو. هڪ سوال جي جواب ۾ ناصر حسين شاهه ٻڌايو ته پي ٽي آءِ وفاق ۾ حڪومت بڻائي رهي آهي، ملڪ جي لاءِ هر شئي بهتر هوندي ان جي حمايت ڪنداسين. سنڌ ۾ حڪومت سازي لاءِ اسان جا دروازا سڀني لاءِ کليل آهن، سڀني جي سامهون ڳالهائيداسين، پر سنڌ کي ورهائڻ جي ڳالهه ڪنهن به صورت ۾ قبول نه ڪنداسين.  اجلاس ۾ اڳوڻي صدر پاڪستان ۽ پ پ پارليامينٽرين جي صدر آصف علي زرداري، قائم علي شاهه، مراد علي شاهه، فريال ٽالپر، نثار کهڙي، وقار مهدي، عاجز ڌامراهه ۽ ٻين به شرڪت ڪئي. بلاول ڀٽو زرداري نون چونڊيل ايم پي ايز کي خطاب ڪندي چيو ته عوام پ پ مان وڏيون اميدون رکي لاڳيتو ٽيون ڀيرو صوبي تي حڪمرانيءَ جو موقعو ڏنو آهي. هن پارلياماني پارٽيءَ کي گذريل 10 سالن جي حڪمراني کي وساري عوام لاءِ وڌيڪ شفاف ۽ ميرٽ بيسڊ حڪمرانيءَ رهڻ جي هدايت ڪئي، پ پ چيئرمين نئين حڪومت کي صاف پاڻي جي فراهمي، صحت ۽ تعليم وارن شعبن ۾ بهتري کي اوليتون بڻائڻ تي زوير ڏيندي چيو ته ڪوبه پاڻ کي سموري ڄمار لاءِ وڏو وزير يا وزير نه سمجهي هو پاڻ  ايم پي ايز سميت حڪومتي مشينريءَ جي نگراني ڪندو. بلاول ڀٽو زرداري چيو ته 2018ع جي چونڊن ۾ مختلف ڪٺ پتلي ڌرين پ پ کي چئلينج ڪرڻ لاءِ اتحاد جوڙيا، پر اسان عوام جي حمايت سان کين شڪست ڏني. هن چيو ته انهن ئي ڪٺ پتلي ڌرين جو هڪ ٻيو گروپ وفاقي حڪومت ٺاهڻ لاءِ سرگرم آهي، پر پ پ سندن کوکلائپ کي بي نقاب ڪري ڌڪي ٻاهر ڪندي، هن چونڊيل ايم پي ايز کي خطاب ڪندي چيو ته اوهان منهنجي ٽيم آهيو ۽ آئون اوهان مان پارٽيءَ جي ماضيءَ واري عروج جي بحاليءَ لاءِ ابهم ڪارڪردگيءَ جي اميد رکان ٿو.

اپنا تبصرہ بھیجیں