چوري ۽ حرام جا پيسا هضم ڪرڻ نه ڏبا، ڪارو ناڻو ثابت ٿيو ته نه ڇڏينداسين: سپريم ڪورٽ

اسلام آباد(بيورو) سپريم ڪورٽ جي چيف جسٽس ميان ثاقب نثار جعلي بينڪ اڪائونٽس بابت ڪيس ۾ ريمارڪس ڏيندي چيو آهي ته اهي پيسا چوريءَ جا آهن، حرام جا ناپاڪ پيسا آهن، اسين اهي پيسا هضم ڪرڻ نه ڏينداسين، پيسا ڪارو ناڻو ثابت ٿيو ته نه ڇڏينداسين. جعلي بينڪ اڪائونٽس بابت ڪيس جي سپريم ڪورٽ ۾ ٻڌڻي ٿي، جنهن دوران ڊي جي ايف آءِ اي بشير ميمڻ عدالت ۾ پيش ٿيو. چيف جسٽس چيو ته جن جا نالا ڪيس۾ آيا آهن، اهي انڪوائري ۾ شامل ٿي ڪليئر ڪرائين، ڊي جي ايف آءِ اي ڪنهن جي خلاف ڪوڙو ڪيس ڪرايو ته ڪارروائي ٿيندي.  جسٽس عمر عطا بنديال چيو ته ڊي جي ايف آءِ اي ٻڌايو آهي ته 29 ماڻهن جي نالن سان اڪائونٽس کليا آهن، ڪچي آبادي جي رهواسي عمير جي نالي سان اڪائونٽس ۾ ڪروڙ رپين جي ٽرانزيڪشن ٿي، اومني گروپ يا جيڪو به گروپ ان ۾ آهي، ان جو جواب چاهيون ٿا. وڪيل جواب فاروق ايڇ نائيڪ چيو ته ڪيس ۾ ڪيترائي ماڻهو بدنام ڪيا پيا وڃن. چيف جسٽس چيو ته بشير ميمڻ ۽ سندس ٽيم بنا سبب جي ڪنهن تي الزام لڳايو ته پاڪستان ۾ نه رهندا، ايف آءِ اي جي غلط ڪم کي سپورٽ نه ڪنداسين. چيف جسٽس وڪيل فاروق ايڇ نائيڪ کان سوال ڪيو ته توهان ڪنهن جي طرفان پيش ٿي رهيا آهيو؟ فاروق ايڇ نائيڪ جواب ڏنو ته آصف زرداري ۽ فريال ٽالپر طرفان پيش ٿي رهيو آهيان، منهنجو وڪالت نامو عدالت ۾ جمع آهي، عدالت ڪيس جي پبلسٽي روڪي. چيف جسٽس چيو ته ايتري پبلسٽي ته ملندي جيتري اسين ڏينداسين، ڇا ايف آءِ اي کي معاملي جي جاچ جو اختيار ناهي. فاروق ايڇ نائيڪ استدعا ڪئي ته پهريان ڏٺو وڃي ته ڇا ٿيو آهي، ايف آءِ اي مني لانڊرنگ جو گوڙ شروع ڪيو آهي، اسين چاهيون ٿا ته جاچ ٿئي. جسٽس عمر عطا بنديال پنهنجي ريمارڪس ۾ چيو ته انهن اڪائونٽس ۾ جيڪي پيسا آهن، اهو ڪارو ناڻو آهي، آسان لفظن ۾ اهي پيسا چوري جا آهن، حرام جا ناپاڪ پيسا آهن، اسين اهي پيسا هضم ڪرڻ نه ڏينداسين، جيڪڏهن ثابت ٿي ويندو ته نه ڇڏينداسين. جنهن تي فاروق ايڇ نائيڪ چيو ته ثابت نه ٿيو ته پوءِ ڇا ٿيندو؟  چيف جسٽس چيو ته ثابت نه ٿيو ته توهان جي اصيل کي ديانتداري جو سرٽيفڪيٽ ڏينداسين. ٻڌڻي دوران عدالتي ڪمري ۾ بينڪ جي اڳوڻي ملازمه پنهنجي ڏيڍ سال جي ٻار سميت پيش ٿي ۽ عدالت کي استدعا ڪئي ته مون کي حراسان ڪيو پيو وڃي، منهنجي گهر پوليس آئي، رات 12 وڳي تائين ڌمڪائڻ جي ڪوشش ڪئي وئي، چيو ويو ته گرفتار ڪرڻ جو حڪم آهي پر نرمي سان پيش اچي رهيا آهيون. عدالت آءِ جي سنڌ امجد جاويد سليمي کي اڌ ڪلاڪ ۾ طلب ڪري ورتو، چيف جسٽس ايڊيشنل آءِ جي سنڌ تي سخت ڪاوڙ جو اظهار ڪيو. چيف جسٽس چيو ته توهان پوليس جو قدم درست هجڻ جو جواز پيش ڪري رهيا آهيو، سيڪريٽري اسٽبلشمينٽ کي گهرائي توهان جي خلاف جاچ ڪرايون ٿا، اڄ سڄو ٿاڻو عدالت ۾ موجود هجڻ گهرجي. چيف جسٽس ايڊيشنل آءِ جي کان پڇاڻو ڪيو ته توهان رياست جا ملازم آهيو يا حڪومت جا؟ عدالت اومني گروپ جي اسپانسر مجيد فيملي کي ايندڙ سومر تي طلب ڪري ورتو.