چونڊن تي اسان کي خدشا آهن پر پارليامينٽ ۾ ويهي ڪردار ادا ڪنداسين: بلاول

0Shares

ڪراچي(چيف رپورٽر) پ پ چيئرمين بلاول ڀٽو زرداري جي صدارت هيٺ بلاول هائوس ۾ پارلياماني اجلاس ٿيو جنهن ۾ سنڌ مان چونڊيل نون قومي ۽ صوبائي اسيمبلي ميمبرن شرڪت ڪئي جڏهن ته اجلاس ۾پ پ جي مرڪزي اڳواڻن راجا پرويز اشرف، فريال ٽالپر، شيري رحمان، خورشيد شاهه، رضا رباني، مراد علي شاهه ۽ ٻيا پڻ موجود هئا. اجلاس ۾ سنڌ اندر حڪومت جوڙڻ ۽ وفاق ۾ جڙندڙ مرڪزي حڪومت سميت ٻين معاملن تي تفصيلي غور ويچار ڪيو ويو تنهن بعد چونڊيل اسيمبلي ميمبرن جي مان ۾ ڪوٺرايل مانجهاندي واري تقريب کي خطاب ڪندي پ پ چيئرمين بلاول ڀٽو زرداري چيو ته چونڊن بعد ڪجهه سياسي پارٽيون پارليامينٽ جو بائيڪاٽ ڪرڻ جون ڳالهيون ڪري رهيون هيون پر اسان انهن کي ائين نه ڪرڻ تي قائل ڪيو جيڪا جمهوري سوچ جي ڪاميابي آهي، اسان کي به چونڊ نتيجن تي تحفظات آهن. هن چيو ته مشڪلات ۽ ڌانڌلين باوجود پيپلز پارٽي 2013ع جي ڀيٽ 2018ع جي چونڊن ۾ بهتر ڪارڪردگي جو مظاهرو ڪيو آهي. بلاول چيو ته گڊ گورننس ۽ بهتر ڪارڪردگي اسان جي نئين حڪومت جي پهرين ترجيح هوندي، اسان کي سنڌ اندر وڌيڪ ڊليور ڪرڻ کي فوڪس ڪرڻو آهي، اسان عوام کي مايوس نه ڪنداسون جنهن اسان کي ايوانن ۾ موڪليو آهي. بلاول وڌيڪ چيو ته اسان کي عالمي ۽ معاشي محاذ تي وڏا چئلينجز آهن. هن چيو ته اسان پنهنجي نظريي جي واڌ ويجهه لاءِ پارليامينٽ جو فورم استعمال ڪنداسون ڇاڪاڻ ته پيپلز پارٽي هميشه جمهوريت ۽ پارليامينٽ کي مضبوط بڻائڻ لاءِ جدوجهد ڪئي آهي. ٻئي طرف  پ پ پ پنجاب  ۾ اپوزيشن ۾ ويهڻ  جو فيصلو ڪري  ڇڏيو آهي. چيئرمين بلاول ڀٽو زرداري چيو آهي ته سياسي مخالفن جو ڄمي مقابلو ڪنداسين. پ پ حڪومت سان  پنجاب مان چونڊيل صوبائي اسيمبلي ميمبرن جي ملاقات ڪئي ۽  حڪومت سازي حوالي سان معاملن تي خيالن جي ڏي وٺ ڪئي.  ذريعن موجب بلاول ڀٽو  زرداري طرفان گرين سگنل ملڻ بعد  پ پ  پنجاب ۾ اپوزيشن  جو ڪردار ادا ڪرڻ جو فيصلو ڪيو آهي.  بلاول چيو ته انگ گهٽ آهي  ته ڇا ٿيو؟ پنجاب ۾ ڄمي اپوزيشن جو ڪردار ادا ڪنداسين. ڏکڻ پنجاب جو صوبو  ڪٺ پتلي ناهي رڳو پ پ ئي ٺاهي سگهي ٿي.  بلاول ڀٽو چيو ته اسين ڪنهن جي غير مشروط  حمايت نه ڪنداسين. اسان جي حمايت  ۽ مخالفت عوامي مسئلن جي بنياد تي هوندي. بلاول ڀٽو پاران نئين چونڊيل اسيمبلي ميمبرن کي مانجهاندو  به ڏنو ويو. ان موقعي تي ڳالهائيندي هن چيو ته پ پ سدائين جمهوريت ۾ پارليامينٽ  کي مضبوط ڪرڻ جي جدوجهد ڪئي آهي. پ پ پنهنجي نظرئي  جي واڌ ويجهه لاءِ پارليامينٽ  جو فورم استعمال ڪندي. ڏکيائين  باوجود پ پ 2013  جي  مقابلي ۾ 2018ع ۾ بهتر  ڪارڪردگي ڏيکاري آهي.  بلاول چيو ته ڪجهه پارٽين پارليامينٽ جي بائيڪاٽ جون ڳالهيون پئي ڪيون پر اسان کين ائين نه ڪرڻ لاءِ قائل ڪيو.

0Shares

اپنا تبصرہ بھیجیں