ڌانڌلين جي شڪايت تي سمورا تڪ کولرائڻ لاءِ تيار آهيان، احتساب سڀ کان پهرين منهنجو ٿيندو، وزيراعظم هائوس ۾ نه رهندس: عمران خان

اسلام آباد(بيوررو) پاڪستان تحريڪ انصاف جي چيئرمين عمران خان چيو آهي ته موجوده الڪشن ڪميشن مسلم ليگ ن جي ۽ پيپلز پارٽي بڻائي هئي، هاڻ انهن ئي پارٽين کي اليڪشن ڪميشن تي اعتراض آهن جڏهن ته نگران حڪومت به سمورين سياسي پارٽين ڳالهين سان بڻائي هئي. بني گالا ۾ پنهنجي گهر ۾ قوم سان خطاب ڪندي عمران خان چيو ته ڌانڌلي جي  شڪايت ڪندڙ پارٽيون جنهن تڪ جو چونديون اُهي ئي تڪ کوليا ويندا. هن چيو ته الله موقعو ڏنو آهي ته پنهنجو خواب پورو ڪري سگهان. پهريون مرحلو مڪمل ٿي چڪو آهي پر هاڻ ٻئي مرحلي ۾ پنهنجي منشور تي عملدرآمد ڪندس. هن چيو ته مون پاڻ هن ملڪ کي ترقي ڪندي ۽ هيٺ ايندي ڏٺو، ان ڪري آئون چاهيان ٿو ته پاڪستان اهڙو ملڪ بڻي جهڙو قائد اعظم محمد علي جناح سوچيو هو. عمران خان چيو ته ماڻهو جمهوريت جي لاءِ ووٽ ڏيڻ لاءِ نڪتا آهن آئون کين ڀيٽا پيش ڪيان ٿو. تحريڪ انصاف جي سربراهه چونڊ مهم دوران دهشتگرد حملن ۾ مارجي ويل چونڊن جي اميدوارن کي به ڀيٽا پيش ڪئي. هن چيو ته بلوچستان جي عوام جمهوريت کي مضبوط ڪيو، پر آئون ڪامياب اليڪشن تي سيڪيورٽي فورسز کي به داد ڏيڻ چاهيان ٿو. عمران خان جو چوڻ هو ته آئون خلفاءِ راشدين جي وقت جهڙو حڪومتي نظام چاهيان ٿو. عمران خان چيو ته آئون بلوچستان جي عوام کي ڀيٽا پيش ڪيان ٿو، دهشتگردي جي واقعن باوجود چونڊ عمل مڪمل ٿيو، ان تي آئون سيڪيورٽي فورسز جي اهلڪارن کي به ڀيٽا پيش ڪيان ٿو. عمران خان چيو ته آئون ان موقعي تي چاهيان ٿو ته سمورا پاڪستان گڏ ٿين ۽ آئون پنهجي خلاف سموري مخالفت کي وساري چڪو آهيان. هن چيو ته هاڻ ملڪ ۾ اهڙي حڪومت ايندي جنهن ۾ ڪنهن کي سياسي انتقام جو نشانو نه بڻايو ويندو. هن چيو ته تحريڪ انصاف جي حڪومت ادارن کي مضبوط ڪندي، ۽ سمورن ماڻهن جي لاءِ قانون کي برابر ڪيو ويندو. هن اهو به چيو ته رڳو مخالف ڌر پارٽين جي ميمبرن جو احتساب نه ٿيندو، پر تحريڪ انصاف پنهنجي ماڻهن جو به احتساب ڪري مثال قائم ڪندي. عمران خان چيو ته ملڪ جو نظام بهتر ڪري پرڏيهين پاڪستان کي دعوت ڏني ويندي ته هو ملڪ ۾ سيڙپڪاري ڪن، ڇو ته پاڪستان ۾ ڪرپشن جي ڪري اهي ماڻهو متحده عرب امارات يا ٻين ملڪن ۾ سيڙپڪاري ڪندا آهن. هن چيو ته هڪ ملڪ جي سڃاڻپ اِها ناهي هوندي ته اُتي امير ڪيئن ٿا رهن پر ملڪ جي سڃاڻپ ائين ٿيندي آهي ته اُتي غريب ڪيئن رهندا آهن. عمران خان چيو ته مديني جي رياست پهرين فلاحي رياست هئي، جتي حضور صلي الله عليه واله وسلم اصول قائم ڪيا، اسان جي ڪوشش هوندي ته پاڪستنا کي به انهن اصول تي آڻيون. تحريڪ انصاف جو چوڻ هو ته مون کي شرم ايندو ته عواب غربت ۾ ۽ آئون وزير اعظم هائوس ۾ رهان. هن چيو ته ان گهر کي واپاري مقصد لاءِ استعمال ڪيو ويندو جنهن جي مدد سان پيسا بڻايا ويندا ۽ مقام عوام تي خرچ ڪيا ويندا. هن چيو ته ننڍي واپار ۾ مدد ڪئي ويندي ۽ نوجوانن کي هنر سيکاريو ويندو. پاڪستان جي پرڏيهي پاليسي جي حوالي سان ڳالهائيندي عمران خان چيو ته اسان پنهنجي حڪومت ۾ چين سان پنهنجي دوستي کي وڌيڪ مضبوط بڻائينداسين. هن چيو ته چين پاڪستان ۾ پاڪ چين اقتصادي راهداري (سي پيڪ) جي ذريعي سيڙپڪاري ڪري رهيو آهي، هن ملڪ مان رڳو ان شعبي ۾ نه پر غربت ۽ ڪرپشڻ جي خاتمي جو طريقو سکيو ويندو. افغانستان جي حوالي سان ڳالهائيندي عمران خان چيو ته پاڪستان پاڙيسري ملڪ ۾ امن جو خواهمشند آهي ۽ ملڪ ۾ امن جي لاءِ هر ممڪن ڪوشش ڪئي ويندي. هن وڌيڪ چيو ته آئون چاهيان ٿو ته پاڪستان ۽ افغانستان جي وچ ۾ اهڙا لاڳاپا قائم ٿين جو ٻنهي ملڪن جي وچ ۾ سرحد يورپي ملڪن جيان کليل سرحد بڻجي وڃي. ان کان سواءِ هن آمريڪا سان بهتر لاڳاپا بڻائڻ جي به خواهش جو اظهار ڪيو. ڀارت جي حوالي سان ڳالهائيندي هن چيو ته ڪجهه ڏينهن اڳ هندوستاني ميڊيا مون تي ائين تنقيد ڪئي ڄڻ آئون ڪو بالي ووڊ جي فلم جو ولن آهيان. هن چيو ته آئون اُهو پاڪستاني آهيان جنهن ڪرڪيٽ جي لاءِ سڀ کان وڌيڪ هندوستان جا دورا ڪيا. عمران خان چيو ته ڀارت ۽ پاڪستان جي وچ لاڳاپا بهتر ٿيڻ گهرجن ۽ ٻنهي ملڪن جي وچ ۾ واپار کي به هٿي ملڻ گهرجي. ڪشمير مسئلي تي ڳالهائيندي عمران خان زور ڏنو ته ٻنهي ملڪن جا بهتر لاڳاپا ٻنهي ملڪن سميت خطي جي لاءِ انتهائي اهم آهن. پنهنجي خطاب جي پڄاڻي تي عمران خان چيو ته پاڪستان جو عوام ملڪ ۾ هڪ مختلف قسم جي حڪومت ڏسندو. هن چيو ته آئون ملڪ جي سمورن طبقن سان گڏ آهيان. اليڪشن ۾ ڌانڌلي جي حوالي سان ڳالهائيندي عمران خان چيو ته اليڪشن ڪميشن مسلم ليگ ن ۽ پيپلز پارٽي بڻائي هئي  ۽ هاڻ انهن ئي پارٽين کي اليڪشن تي اعتراض آهن. هن چيو ته پارٽيون جنهن تڪ جو چونديون اُهي تڪ کولينداسين. عمران خان چيو ته وزيراعظم هائوس ۾ رهڻ شرم جهڙي ڳالهه هوندي، منسٽر انڪليو ۾ رهندس، وزيراعظم هائوس شاهاڻو محل آهي، گورنر هائوسز کي عوام جي لاءِ استعمال ڪيو ويندو، احتساب سڀ کان پهرين منهنجو ٿيندو، اينٽي ڪرپشن کي مضبوط ڪنداسين، عمران خان چيو ته ٽيڪس جو پئسو بچائي عوام لاءِ خرچ ڪيو ويندو، اسان حڪومتي خرچ گهٽ ڪنداسين.