لاڙڪاڻي ۾ پولنگ اسٽيشن ويجهو بم ڌماڪو، پ پ جا 6 ڪارڪن زخمي

لاڙڪاڻو(بيورو رپورٽ) اليڪشن دوران لاڙڪاڻي شهر جي مارڪيٽ ٿاڻي جي حد سريا پڌر واري پولينگ اسٽيشن ڀرسان بم ڌماڪو مختلف پارٽين جا ڪيترائي ڪارڪن زخمي اسپتال داخل بم ڦاٽڻ سبب علائقي ۾ خوف حراس ڇائجي ويو، خبر موجب لاڙڪاڻي شهر جي سريا پڌرواري علائقي ۾ اليڪشن دوران پولينگ اسٽيشن ڀرسان بم ڌماڪي سان ڦاٽي پيو، جنهن سبب مختلف پارٽين جا ڪارڪنن غلام مرتضيٰ ڀٽو، ذوالفقار سرهيو، محمد صالح لاشاري، فهيم سرهيو، محمد نواز شيخ، اسد الله شيخ سميت ٻيا سخت زخمي ٿي پيا، جن کي علائقي واسين پاران ڳڻتي جوڳي حالت ۾ کڻائي چانڊڪا ميڊيڪل اسپتال جي ايمرجنسي واري وارڊ ۾ داخل ڪيو ويو، جتي بم ڌماڪي ۾ زخمي ٿيل ماڻهن جو علاج ڊاڪٽرن پاران جاري آهي، جڏهن ته رينجرس، پوليس ۽ بم اسڪوارڊ ٽيم جا عملدار واقعي واري هنڌ پهچي ويا، ان موقعي تي لاڙڪاڻو پوليس جي اعليٰ عملدارن واقعي بابت صحافين سان ڳالهائيندي چيو ته واقعي جي جاچ ڪري رهيا آهيون، جڏهن ته اليڪشن دوران سڪيورٽي جا انتظام سخت ڪيا ويا آهن، شهر جي سمورين پولنگ اسٽيشنن تي پوليس سميت پاڪ آرمي ۽ ريجرس پڻ موجود آهي، هنن چيو ته واقعي واري هنڌ تان شاهديون گڏ ڪيون ويون آهن وڌيڪ معاملي جي جاچ ڪرڻ بعد ڪجھ ٻڌائي سگهجي ٿو. ٻئي طرف پاڪستان پيپلز پارٽي جي چيئرمين بلاول ڀٽو زرداري سخت سڪيورٽي ۾ ڪالھ لاڙڪاڻي شهر جي چانڊڪا ميڊيڪل اسپتال جي ايمرجنسي واري وارڊ پهتو، جتي هن اليڪشن واري ڏينهن لاڙڪاڻي شهر جي سريا پڌر واري علائقي ۾ پولنگ اسٽيشن ڀرسان بم ڌماڪي ۾ زخمي ٿيلن سان ملاقات ڪري عيادت ڪئي، ان موقعي تي پ پ چيئرمين بلاول ڀٽو زرداري ميڊيه سان ڳالهائيندي چيو ته پولنگ اسٽيشن وٽ ٿيل بم ڌماڪي جي سخت لفظن ۾ مذمت ڪريا ٿو، جڏهن ته اهڙا واقعا پ پ لاءِ هڪ سازش آهن، جيڪي ڪنهن صورت ۾ برداشت نه ڪنداسين، هن چيو ته اهڙا واقعا اسان ۾ خوف ڦلائڻ لاءِ ڪيا پيا وڃن، ته جيئن دهشت پيدا ٿي سگهي، پر اسان انهن ڌماڪو ڪرڻ وارن کي ٻڌائڻ ٿا چاهيون ته اسان جا حوصلا بلند آهن اهڙا ڌماڪا اسان جي حوصلن کي ڪجھ به نه ٿا ڪري سگهن. هوڏانهن جميعت علماءِ اسلام صوبي سنڌ جي اڳواڻ مولانا راشد خالد محمود سومرو ڪالھ چانڊڪا ميڊيڪل اسپتال جي ايمرجنسي واري وارڊ ۾ پهچي سريا پڌر واري پولنگ اسٽيشن ڀرسان بم ڌماڪي ۾ زخمي ٿيلن ماڻهن سان ملاقات ڪري عيادت ڪئي، ان موقعي تي هن چيو ته اسان هن حملي جي سخت لفظن ۾ مذمت ڪيون ٿا ۽ مطالبو ٿا ڪريون ته هن واقعي جي صاف شفاف جاچ ڪرائي واقعي ۾ زخمي ٿيلن سان انصاف ڪيو وڃي، ان موقعي تي جميعت علماءِ اسلام لاڙڪاڻي جو پريس ترجمان حميد الله سيال، مولانا عبدالغفار ڀٽو سميت ٻيا ڪيترائي اڳواڻ ۽ ڪارڪن موجود هئا.  

اپنا تبصرہ بھیجیں