ضلعي انتظاميا ۽ پوليس کي الرٽ رهڻ جو حڪم، بهترين انتظام ڪيا آهن: فضل الرحمان

ڪراچي (چيف رپورٽر) سنڌ جي نگران وڏي وزير فضل الرحمان جي صدارت هيٺ وزيراعليٰ هائوس ۾ اهم اجلاس جنهن ۾ پولنگ اسٽيشنن جي حوالي سان انتظامن جو جائزو ورتو ويو. اجلاس ۾ چيف سيڪريٽري سنڌ ميجر (رٽائرڊ) اعظم سليمان، انسپيڪٽر جنرل پوليس سنڌ امجد جاويد سليمي ۽ بورڊ آف روينيو جو سينئر آفيسر اقبال دراني، وڏي وزير جو پرنسپل سيڪريٽري سهيل راجپوت ۽ صوبائي گهرو سيڪريٽري محمد هارون شرڪت ڪئي. چيف سيڪريٽري ميجر (رٽائرڊ) اعظم سليمان بريفنگ ڏيندي چيو ته نگران وڏي وزير جي هدايت تي هن انسپيڪٽر جنرل پوليس سنڌ امجد جاويد سليمي ۽ بورڊ آف روينيو جو سينئر آفيسر اقبال دراني سان گڏجي سڀني ضلعن ۽ سمورن حساس ۽ ٻين پولنگ اسٽيشنن جا دورا ڪيا ۽ اليڪشن ڪميشن آف پاڪستان جي هدايتن تحت سمورن ضروري انتظامن کي يقيني بڻايو ويو آهي. هن چيو ته سڄي صوبي ۾ 5673 تمام حساس پولنگ اسٽيشن آهن جتي 20165 بوٿ قائم ڪيا ويا آهن. هن چيو ته نگران ڪابينا جي فيصلي جي روشنيءَ ۾ اتي سي سي ٽي وي ڪئميرا پڻ لڳايا ويا آهن. هن چيو ته گڏيل طور تي 21 هزار ڪئميرا پولنگ اسٽيشنن تي لڳايا ويا آهن، انهن جي چڪاس پڻ ڪئي وئي آهي ۽ اهي صحيح ريت ڪم ڪري رهيا آهن. عارضي طور تي قائم ڪيل 307 پولنگ اسٽيشنن بابت چيف سيڪريٽريءَ ٻڌايو ته انهن ۾ موبائل واش روم، جنريٽرز، يو پي ايس، ايل اِي ڊي ۽ ٻيون سهولتون فراهم ڪيون ويون آهن. پولنگ اسٽيشنن تي پاڻيءَ جي سهولت جي گهٽتائي واري تاثر بابت هن چيو ته سمورن پولنگ اسٽيشنن تي پاڻي، ريفريشمينٽ ۽ ٻين سمورين سهولتن جا انتظام ڪيا ويا آهن. هن چيو ته پولنگ اسٽيشنن تي پولنگ اسٽاف ۽ اليڪشن مٽيريل جي ٽرانسپورٽ جا پڻ انتظام ڪيا ويا آهن. ڊويزنل ڪمشنرن ۽ سمورا ڊپٽي ڪمشنر صاف، شفاف ۽ آزادانه چونڊن واري عمل جي حوالي سان ڀرپور سهڪار ڪري رهيا آهن. نگران وڏي وزير کي آءِ جي پوليس امجد جاويد سليميءَ شرپسندن جي حوالي سان نگران وڏي وزير کي ٻڌايو ته ڪوبه چونڊن واري عمل کي خراب ڪرڻ جي ڪوشش ڪندو ته انهن خلاف زيرو ٽالرنس واري پاليسي آهي. پوليس هن وقت تائين 2185 وڳوڙ ڪندڙ گرفتار ڪيا آهن. هن چيو ته ڪنهن به قانون جي ڀڃڪڙي ڪرڻ جي ڪوشش ڪئي ته ان خلاف سخت ڪارروائي ڪئي ويندي. هن چيو ته سمورن پولنگ اسٽيشنن ۽ پولنگ اسٽاف ۽ کين سهڪاري اسٽاف کي بهترين سڪيورٽي فراهم ڪئي وئي آهي ۽ سڪيورٽيءَ جا اهي انتظام جيستائين اليڪشن عملو پنهنجي گهر تائين نه ٿو پهچي جاري رهندو. نگران وڏي وزير ضلعي انتظاميا ۽ پوليس کي هدايت ڪئي ته اهي سموري صوبي ۾ الرٽ رهن. هن چيو ته مونکي ان ڳالهه تي خوشي آهي ته اسان بهترين انتظام ڪيا آهن ۽ انشاءَ الله نئين حڪومت جي چونڊجڻ تائين سموار ڪم بهتر ٿيندا.5