اڳوڻي وزيراعظم نواز شريف بيماري باوجود اسپتال منتقل ٿيڻ کان انڪار ڪري ڇڏيو

راولپنڊي (م ڊ) اڳوڻي وزيراعظم نواز شريف ڊاڪٽرن جي سفارش باوجود اسپتال منتقل ٿيڻ کان انڪار ڪري ڇڏيو آهي.  پمز اسپتال جي ماهرن تي ٻڌل چار رڪني ميڊيڪل بورڊ اڊيالا جيل ۾ نواز شريف جو طبي معائنو ڪيو. پمز اسپتال اسلام آباد جي ماهرن تي ٻڌل ميڊيڪل بورڊ اڳوڻي وزيراعظم  نواز شريف جو طبي معائنو ڪيو آهي. ميڊيڪل بورڊ ۾ پمز اسپتال  جي ڪارڊيالوجسٽ ڊاڪٽر نعيم ملڪ ۽ ميڊيڪل اسپيشلسٽ ڊاڪٽر شجيع سميت ڊاڪٽر سهيل تنوير ۽ گيسٽرولجسٽ ڊاڪٽر مشهود شامل آهن. ميڊيڪل بورڊ کي جيل ڪالوني گيٽ مان اندر موڪليو ويو جڏهن ته ان کان اڳ نواز شريف کي سندس سيل مان جيل اسپتال منتقل ڪيو ويو. نواز شريف جي ميڊيڪل رپورٽ آءِ جي جيل لاهور کي موڪلي ويندي. ميڊيڪل بورڊ جي رپورٽ جي روشني ۾ نواز شريف کي اسپتال منتقل ڪرڻ جو فيصلو ڪيو ويندو. ميڊيڪل بورڊ پاران جوڙيل رپورٽ ۾ چيو ويو آهي ته گهڻي پگهر سبب نواز شريف جي جسم ۾ پاڻي جي کوٽ آهي جڏهن ته گرمي ۽ ننڊ ۾ گهٽتائي به سندس صحت کي متاثر ڪيو آهي. رپورٽ ۾ چيو ويو آهي ته نواز شريف جي جسم ۾ پاڻي جي کوٽ سبب گردا فيل ٿيڻ جو خدشو آهي، جيڪڏهن صورتحال بهتر نه ٿي ته کيس دل جو مرض وڌي سگهي ٿو. ميڊيڪل بورڊ ۾ تجويز ڏني وئي آهي ته صورتحال کي نظر ۾ رکندي نواز شريف کي راولپنڊي انسٽيٽيوٽ آف ڪارڊيالوجي منتقل ڪيو وڃي. ذريعن موجب نواز شريف ميڊيڪل بورڊ جي رپورٽ باوجود اسپتال منتقل ٿيڻ کان انڪار ڪيو آهي. هوڏانهن آءِ جي جيل جي درخواست تي نواز شريف جي علاج لاءِ 5 رڪني ميڊيڪل بورڊ به جوڙيو ويو. دستاويزن موجب نواز شريف جو علاج ڪندڙ ميڊيڪل بورڊ جي انچارج ڊاڪٽر اعجاز قدير آهي جڏهن ته ڊاڪٽر شجيع صديقي، ڊاڪٽر نعيم ملڪ، ڊاڪٽر سهيل تنوير ۽ ڊاڪٽر مشهود به ميڊيڪل بورڊ جا ميمبر آهن. جيل ذريعن جو چوڻ آهي ته اڳوڻي وزيراعظم نواز شريف کي طبي معائني سيل مان ڪڍي جيل اسپتال منتقل ڪيو ويو آهي جتي پمز اسپتال جي ميڊيڪل ٽيم معائنو ڪيو.5c