سريلنڪا ڏکڻ آفريڪا کي ٻي ٽيسٽ ۾ 199 رنسن تان شڪست ڏئي 0-2 تان وائيٽ واش ڪري ڇڏيو

ڪولمبو(اسپورٽس نيوز) رنگنا هيراٿ جي تباهه ڪن بالنگ سبب سريلنڪا ٻي ٽيسٽ ميچ ۾ عالمي نمبر 2 ڏکڻ آفريڪا کي 199 رنسن تان شڪست ڏئي سيريز ۾ 0-2 تان ڪلين سوئپ مڪمل ڪري ورتي.  ڪولمبو ۾ کيڏيل ميچ ۾ سريلنڪا پهرين اننگز ۾ 338 رنسون ٺاهيون جنهن جي جواب ۾ ڏکڻ آفريڪا بيٽنگ لائن هڪ ڀيرو ٻيهر بدترين ناڪامي جو شڪار ٿي ۽ پوري ٽيم صرف 124 رنسن تي ڍير ٿي وئي. پر سريلنڪا فالو آن ڪرائڻ بدران پاڻ بيٽنگ جو فيصلو ڪيو ۽ ٻي اننگز 275 رنسن تي 5 رانديگرن جي آئوٽ ٿيڻ تي ٽيم ڊڪليئر ڪري ڏکڻ آفريڪا کي فتح لاءِ 490 رنسن جو مشڪل هدف ڏنو پر ٻي اننگز ۾ به مهمان ٽيم 113 رنسن تي اڌ ٽيم آئوٽ ٿي وئي سومر تي ميچ جي چوٿين ڏينهن ڏکڻ آفريڪا 139 رنسن تي 5 رانديگر آئوٽ تان نامڪمل اننگز جي شروعات ڪئي ته ٿيونس ڊي برون ۽ ٽيمبا باووما وڪيٽ تي موجود هئا. ٻنهي رانديگر بهترين بيٽنگ جو مظاهرو ڪيو ۽ ڇهين وڪيٽ لاءِ 123 رنسن جي ڀائيواري قائم ڪئي پر مانيءَ جي وقفي کان ڪجهه دير پٿهريان هيراٿ پنهنجي ٽيم کي اهم ڪاميابي ڏياريندي 63 رنسون ٺاهيندڙ باووما کي پويلين جي راهه ڏيکاري. ڏکڻ آفريڪا کي جلد ئي هڪ ٻيو وڏو ڌچڪو لڳو ۽ ڪوئنٽن ڊي ڪوڪ وڪيٽن اڳيان پيڊ آڻڻ جي ڪوشش ۾ هيراٿ جو شڪار ٿي ويو. ڊي برون ٻي اينڊ تان جدوجهد جاري رکي ۽ ٽيسٽ ڪرڪيٽ ۾ پنهنجي پهرين سينجري مڪمل ڪئي پر سينچري جي پوري ٿيڻ کان فورن بعد هيراٿ هن کي به آئوٽ ڪري ڇڏيو. هن آئوٽ ٿيڻ کان اڳ 101 رنسون ٺاهيون. ان کانپوءِ سريلنڪا کي فتح لاءِ وڌيڪ انتظار نه ڪرڻو پيو ۽ هيراٿ 290 جي گڏيل اسڪور تي ڊيل اسٽين جي وڪيٽ حاصل ڪري پنهنجي ٽيم کي ميچ ۾ 199 رنسن تان فتح ڏياري ڇڏي هيراٿ شاندار بالنگ جو مظاهرو ڪندي 98 رنسن عيوض 6 وڪيٽون حاصل ڪيو.. سريلنڪا ٻن ميچن جي ٽيسٽ سيريز ۾ 0-2 تان ڪلين سوئت مڪمل ڪري ڇڏي. دمٿ ڪرونارتني کي بهترين بيٽنگ تي ميچ ۽ سيريز جو بهترين رانديگر قرار ڏنو ويو.