سينيٽ ۾ وڏين پارٽين جي اليڪشن ڪميشن ۽ نگران حڪومت تي ڇتي تنقيد، پنجاب جي وڏي وزير کان استعيفيٰ جو مطالبو

 اسلام آباد(بيورو رپورٽ) سينيٽ اجلاس ۾ پارليامينٽ جي ميمبرن چونڊن جي شفافيت تي خدشن جو اظهار ڪندي اليڪشن ڪميشن ۽ نگران حڪومت کي سخت تنقيد جو نشانو بڻايو آهي. جڏهن ته پنجاب جي نگران وڏي وزير حسن عسڪري جي استعيفيٰ جو پڻ مطالبو ڪيو ويو. نجي  سينيٽ اجلاس ۾ ن ليگ ۽ پ پ پ جي سينيٽرن اليڪشن ڪميشن ۽ نگران حڪومت کي سخت تنقيد جو نشانو بڻايو. رضا رباني خيالن جو اظهار ڪندي چيو ته ن ليگ جي ڪارڪنن کي گرفتار ڪيو پيو وڃي، چونڊون شفاف ڪيئن ٿينديون؟ فوجي جوانن کي پولنگ اسٽيشن اندر ڇو مقرر ڪيو پيو وڃي؟ جيڪڏهن چونڊن ۾ ڌانڌلي ٿي ته سنگين نتيجا ڀوڳڻا پوندا. رضا رباني چيو ته اليڪشن ڪميشن کي اهو نظر نه پيو اچي ته 2 وڏين پارٽين کي ٽارگيٽ ڪيو پيو وڃي، اميدوارن کي سڏايو پيو وڃي ته چونڊ مهم ڇڏي نيب آفيس اچي ويهو، ڪجهه اخبارن کي مخصوص علائقن ۾ نه پيو ورهايو وڃي، اليڪشن ڪميشن کي اهو سڀ ڪجهه نظر نه پيو اچي؟ پاڪستاني قوم اليڪشن ڪميشن کان جواب ٿي گهري، نگران حڪومت ۽ اليڪشن ڪميشن آئيني ذميواري ادا ڪرڻ ۾ ناڪام وئي آهي، شاهد خاقان عباسي جي ڪارنر گڏجاڻي ۾ به پٿراءُ ڪيو ويو، اليڪشن ڪميشن ائين خاموش ويهي رهي آهي جيئن کيس ڪجهه نظر نه پيو اچي. رضا رباني چيو ته اليڪشن ڪميشن بينڪ عملي کي ڪهڙي بنياد تي پولنگ اسٽاف طور مقرر ڪيو آهي، هٿياربند فوج کي سڏائڻ جو ضابطا اخلاق يا قاعدو قانون ڪهڙو آهي؟ اليڪشن ڪميشن پهريان چئي رهي هئي ته فوجي جوان پولنگ اسٽاف ٻاهريان ئي مقرر هوندا ته هاڻي انهن کي پولنگ اندر مقرر ڪرڻ واري فيصلي جو سبب ڇا آهي؟ ڪهڙي شق تحت اليڪشن ڪميشن پابندي مڙهيل تنظيمن ۽ فورٿ شيڊول تي موجود ماڻهن کي چونڊ وڙهڻ جي اجازت ڏني وئي؟ اهي ماڻهو جن مٿان ڪيس آهن، انهن جو رڪارڊ اليڪشن ڪميشن ڪڏهن گهرايو؟ مخالف ڌر اڳواڻ شيري رحمان چيو ته حالتون بهتر نظر نه پيون اچن، چونڊون ۽ ملڪ ٻه واٽي تي ٻيٺل آهن، توهان هٿياربند تنظيمن کي مين اسٽريم ۾ آڻي پاڪستان ۾ ڇڪتاڻ پيدا ڪري رهيا آهيو، جڏهن اهي ماڻهو ايوان ۾ آيا ته هتي ڪهڙو بحث ڪندا؟ پابندي مڙهيل تنظيمون ايوان ۾ اچي ويون ته اهي ماڻهو مين اسٽريم ۾ اچي ويندا، جيڪڏهن اهي ماڻهو هتي اچي ويا ته پوءِ هتي ڪنهن کي ساهه کڻڻ جي اجازت هوندي؟ پنجاب جي نگران گهرو وزير کي ترت استعيفيٰ ڏيڻ گهرجي.ن ليگ سينيٽر پرويز رشيد چيو ته نگران حڪومت جواب ڏي ته ڪنهن سان لاڏلي ۽ ڪنهن سان ماٽيلي وارو ورتاءُ ڪيو پيو وڃي، ڪالهه ئي احتساب عدالت عمران خان کي هيليڪاپٽر ڪيس ۾ ڇوٽ ڏني، جيڪڏهن لاڏلي کي ڇوٽ ملي سگهي ٿي ته حنيف عباسي کي ڇو نٿي ملي سگهي؟ پنجاب جي نگران وڏي وزير ڀارتي اخبار ۾ اڳڪٿي ڪئي ته پنجاب ۾ تحريڪ انصاف جون سيٽون وڌي وينديون، حسن عسڪري کي ان تي استعيفيٰ ڏيڻ گهرجي. راجا ظفر الحق چيو ته نگران حڪومت چونڊن ۾ ڌر آهي ۽ خاص نتيجا حاصل ڪرڻ جي ڪوشش ڪري رهي  آهي