عمران خان روز نئين ڳالهه ڪندو آهي، سندس يوٽرن کي “ فالو” نه ٿو ڪري سگهان: بلاول

0Shares

ڪوئيٽا (م ڊ) پ پ چيئرمين بلاول ڀٽو زرداري چيو آهي ته پاڪستاني قوم بهادر آهي، 25 جولاءِ تي ووٽ جي مدد سان دهشتگردن کي شڪست ڏيندي. پ پ چيئرمين بلاول ڀٽو زرداري ڪوئيٽا ۾ سراوان هائوس پهچي سراج رئيساڻي جي وارثن سان تعزيت ڪئي. ان موقعي تي ميڊيا سان ڳالهائيندي بلاول ڀٽو زرداري چيو ته دهشتگردي جا واقعا ڪٿي به نه هئڻ گهرجن، اليڪشن هڪ خوف جي ماحول ۾ وڙهي رهيا آهيون. هن چيو ته  اليڪشن کان اڳ دهشتگرديءَ جا واقعا ٿي رهيا آهن ۽ دهشتگرديءَ جا واقعا افسوس جوڳا آهن. سندس چوڻ هو ته اسان کي ٻڌايو ويو هو ته دهشتگردي کي چيلهه چٻي ڪئي وئي آهي، سڪيورٽي اسان جي پهرين ترجيح هئڻ گهرجي. بلاول ڀٽو زرداري چيو ته پ پ کي اميد آهي ته عام چونڊون وقت تي ٿينديون. هن چيو ته پاڪستاني قوم بهادر آهي، 25 جولاءِ تي ووٽ جي مدد سان دهشتگردي کي شڪست ڏينداسين. سندس چوڻ هو ته ڪٿي به دهشتگرديءَ جا واقعا نه ٿيڻ گهرجن، اليڪشن هڪ خوف جي ماحول ۾ وڙهڻ وڃي رهيا آهيون.سي ايم ايڇ ۾ زخمين جي عيادت کانپوءِ ميڊيا سان ڳالهائيندي بلاول ڀٽو زرداري چيو ته اسان جي معيشت تباهه ٿي وئي آهي، عالمي برادريءَ سان ڇڪتاڻ وارا لاڳاپا آهن. هن چيو ته نئين حڪومت کي معيشت توڙي عالمي برادريءَ سان بهتر لاڳاپن جهڙن مسئلن کي منهن ڏيڻو پوندو. سندس چوڻ هو ته عمران خان ڪي پي مان دهشتگردي ختم نه ڪئي آهي، احتساب جا ادارا بند پيل آهن. بلاول ڀٽو زرداري چيو ته شهباز شريف ۽ عمران خان سان نظرياتي اختلاف آهن،  احتساب بنا فرق ٿيڻ گهرجي. هن چيو ته سياست کي فٽبال وانگر کيڏيو ويندو ته ڪرپشن جو اشو ختم نه ٿيندو. سندس چوڻ هو ته سموري ملڪ ۾ احتساب جو هڪ ئي نظام هئڻ گهرجي. بلاول ڀٽو زرداري چيو ته دهشتگرديءَ جي خاتمي لاءِ قومي ايڪشن پلان تي عملدرآمد نه ٿيو آهي. هن  چيو ته عمران خان روز نئين ڳالهه ڪندو آهي، سندس يوٽرن کي فالو نه ٿو ڪري سگهان. سندس چوڻ هو ته انتها پسندي ۽ دهشتگردي سموري ملڪ جو مسئلو آهي، معيشت بدحالي جو شڪار آهي.

0Shares

اپنا تبصرہ بھیجیں