ملڪي تاريخ ۾ پهريون ڀيرو اليڪشن عملي کان قسم نامو وٺڻ جو فيصلو

 اسلام آباد (بيورو) اليڪشن ڪميشن آف پاڪستان ملڪي تاريخ ۾ پهريون ڀيرو چونڊ عملي کان قسم نامو وٺڻ جو فيصلو ڪيو آهي. اليڪشن ڪميشن پولنگ عملي لاءِ هدايتون جاري ڪري ڇڏيون آهن، جنهن مطابق پولنگ شروع ٿيڻ کان اڳ پرزائيڊنگ آفيسر هر ضلعي جي آر او کان عهدي جو قسم نامو وٺندو. اليڪشن ڪميشن مطابق پرزائيڊنگ آفيسر پولنگ جي باقي عملي کان حلف وٺندو، جڏهن ته چونڊ عملي کي پولنگ جي وقت کان گهٽ ۾ گهٽ 2 ڪلاڪ پهريان پولنگ اسٽيشن تي پهچڻ جي هدايت ڪئي وئي آهي. اليڪشن ڪميشن جو چوڻ آهي ته پولنگ عملي کي اميدوار پاران ملندڙ مالي سهڪار يا تحفي کي رشوت تصور ڪيو ويندو، جڏهن ته پولنگ عملي تي فرض جي ادائيگي دوران سياسي راءِ جي اظهار تي به پابندي لاڳو هوندي. اليڪشن ڪميشن مطابق پولنگ عملو اهڙو لباس يا علامت اختيار نه ڪري، جنهن سان ڪنهن پارٽي جي وابستگي ظاهر ٿئي، جڏهن ته فرض ۾ ڪوتاهي تي عملي خلاف اليڪشن ڪميشن سنئون سڌو ڪارروائي ڪندي. اليڪشن ڪميشن پولنگ اسٽيشن تي موبائل فون کڻي وڃڻ تي پڻ پابندي لاڳو ڪئي آهي. ٻئي طرف  اليڪشن ڪميشن پولنگ واري ڏينهن بنا رنڊڪ بجلي جي فراهمي لاءِ سيڪريٽري پاور ڊويزن کي خط لکي ڇڏيو آهي. اليڪشن ڪميشن طرفان لکيل خطن موجب 25 جولاءِ تي صبح 8 وڳي کان شام 6 وڳي تائين پولنگ ٿيندي جنهن جي فوري بعد ڳڻپ جو عمل شروع ٿي ويندو. اليڪشن ڪميشن 25 ۽ 26 جولاءِ تي بجلي جي فراهمي جي هدايت ڪندي خط ۾ چيو ته چونڊ عمل کي هموار بڻائڻ لاءِ بجلي جي بنا رنڊڪ فراهمي يقيني بڻائي وڃي. ٻئي طرف ملڪي تاريخ ۾ پهريون ڀيرو ووٽنگ جي وقت ۾ هڪ ڪلاڪ اضافو ڪيو ويو آهي. ان کان اڳ پولنگ جو وقت صبح 8 وڳي کان شام پنجين وڳي تائين هوندو هو پر هاڻي شام 6 وڳي تائين وڌايو ويو آهي.