نوازشريف ۽ مريم نواز جي اڄ ڏيهه واپسي، نيب گرفتاري لاءِ پلان جوڙي ورتو، لاهور ايئرپورٽ تي ڪمانڊوز مقرر

0Shares

اسلام آباد / لنڊن (بيورو +  م ڊ)  اڳوڻي وزيراعظم نوازشريف ۽ سندس ڌيءَ مريم نواز جي اڄ ڏيهه واپسي، نيب گرفتاري لاءِ انتظاممڪمل ڪري ورتا، ايئرپورٽ تان ئي گرفتار ڪرڻ جو فيصلو. تفصيل  موجب اڳوڻو وزيراعظم نوازشريف ۽ مريم نواز اڄ لنڊن کان واپسيڌ  ڏيهه  پهچندا. ن ليگ پاران نوازشريف ۽ مريم ۽ نواز جو شاندار استقبال ڪرڻ جو فيصلو ڪيو ويو آهي. نوازشريف  ۽ مريم نواز اڄ ابو ظهبي کان ڏيهه پهچندا. ٻئي طرف لنڊن ۾ ميڊيا سان ڳالهائيندي نوازشريف چيو ته ملڪ کي بربادي  ڏانهن  ويندي ڏسي رهيو آهيان. جيڪو ڪجهه ٿئي پيو ماڻهو سڀ سمجهن پيا، ٻيون پارٽيون چونڊ مهم هلائين پيون، اسان جا ڪارڪن گرفتار ٿين پيا. هي ڪهڙي قسم جون چونڊون ڪرايون پيون وڃن، چونڊن کان اڳ ڌنڌلي شروع ٿي وئي آهي. لاهور مان اسان جا ڪارڪن گرفتار ٿين پيا. هن چيو ته مون ۽ مريم نواز ڪا به  ڪرپشن ناهي ڪئي، اسان ڄاڻون ٿا ته هتان کان جيل وڃڻو آهي. اسان قوم خاطر  پاڪستان وڃي رهيا آهيون.  ڪلثوم نواز  اڄ ٿوري دير لاءِ اکيون کوليون. اهڙين حالتن ۾ ڪو به مڙس پنهنجي گهر واري کي ڇڏي نٿو سگهي. مون کي يقين  آهي ته قوم منهنجو ساٿ ڏيندي جيڪڏهن  ملڪ ۾ تبديلي نه آئي ته ملڪ لڙهي ويندو. ٻئي طرف  نيب نوازشريف ۽ مريم نواز شريف  کي گرفتار  ڪرڻ لاءِ انتظام مڪمل ڪري ورتا آهن. نوازشريف ۽ مريم نواز  کي لاهور ايئرپورٽ  تان ئي گرفتار ڪيو ويندو.  لاهور  ايئرپورٽ  تي هيليڪاپٽر جو بندوبست  ڪيو ويو آهي. نيب  جي 16 رڪني ٽيم به جوڙي وئي آهي.  اسلام آباد ۽ لاهور  سيڪيورٽي جا سخت  انتظام ڪيا ويا آهن،  موٽر وي  کي ڪنٽينر  رکي سيل ڪيو ويو آهي. ايئرپورٽ تي اپيليٽ ڪمانڊوز مقرر  ڪيا ويا آهن. نوازشريف ۽ مريم نواز  کي گرفتار  ڪرڻ بعد هيليڪاپٽر وسيلي اڊيالا جيل منتقل ڪيو ويندو. هوڏانهن  نيب چيئرمين جسٽس (ر) جاويد اقبال چيو آهي ته نواز شريف ۽ مريم نواز جي گرفتاري وارنٽ تي عمل يقيني بڻائينداسين. پنهنجي تازي بيان ۾ نيب چيئرمين چيو آهي ته نواز شريف ۽ مريم نواز جي گرفتاري ۾ ڪنهن به قسم جي رنڊڪ وجهندڙ خلاف ڪارروائي ڪئي ويندي ۽ احتساب عدالت طرفان جاري گرفتاري وارنٽ تي عمل ڪيو ويندو. هوڏانهن  نگران حڪومت نواز شريف ۽ مريم نواز کي ڏيهه واپسيءَ تي لاهور ايئرپورٽ تان ئي گرفتار ڪرڻ جو فيصلو ڪري ڇڏيو آهي. اسلام آباد ۾ ميڊيا سان ڳالهائيندي علي ظفر خان چيو ته نواز شريف ۽ مريم نواز خلاف عدالتي فيصلو آيو آهي ته کين گرفتار ڪيو ويندو. هن چيو ته سزا مليل شخص کي گرفتار ڪرڻ اسان جو فرض آهي، ايئن نه ٿو ٿي سگهي ته کين لاهور ۾ ڦرڻ ڏنو وڃي. سندس چوڻ هو ته پنجاب حڪومت ۽ انتظاميه امن امان جو مسئلو پيدا ٿيڻ نه ڏيندي. علي ظفر چيو ته امن امان جو مسئلو پيدا ٿيڻ نه ڏينداسين،نيب کي سهولت ملندي ته سڀ ڪجهه باعزت نموني ڪيو وڃي. سڌ سماءَ واري وفاقي وزير چيو ته اهو غلط آهي ته مخصوص ماڻهن جو احتساب ڪيو پيو وڃي، نواز شريف ۽ مريم نواز کي فيصلي خلاف اپيل جو حق آهي.

0Shares

اپنا تبصرہ بھیجیں